الحمد لله الذي بنعمته تتم الصالحات
ހުޅުދުއްފާރަށް ނިސްބަތްވިޔަސް، އަޅުގަނޑުގެ ހަޔާތުގެ ބޮޑުބައެއް ހޭދަކުރެވިފައިވަނީ ރަށުން ބޭރުގައެވެ. ރަށުގެ ހަބަރު ދަބަރު ހޯދުމަށް ފަސޭހަގޮތެއް ނޯވެއެވެ. ރަށަށް އެނބުރި އަންނަ ކޮންމެފަހަރަކު އިހަށްވުރެ ބޮޑަށް ބީރައްޓެހިކަން އިހްސާސްކުރެވެއެވެ. ވާނީވެސް އެހެންތާއެވެ، ފެންނަ ޅައުމުރުގެ ކުދިންގެ ނަމެއް ނޭނގެއެވެ. އާ އިމާރާތްތައް ފެނެއެވެ. ވާއެއް ނުވާއެއް ނޭންގޭ ފަހަރުވެސް ދެއެވެ. އެހެނަސް ނިކަން އެނގޭކަމަށް ހެދިގެން އުޅެނީއެވެ. އެއީ ކާކުހޭ އަހައިގެން ލަދެއްގައި ބެދިދާނެތީވެސް މެއެވެ.
ކޮންމެއަކަސް މިއުޅެނީ ރަށުގެ އެންމެންގެ ނަންތައް އެނގޭކަށެއް ނޫނެވެ. އެހެނަސް އެންމެ ކުޑަމިނުން ރަށުގެ ބޮޑެތި ޚަބަރުތައް އެނގުން ވަރަށް މުހިއްމު ކަމުގައި ދެކެމެވެ. އަޅުގަނޑަކީ ސޮފްޓްވެއަރ ޑިވެލޮޕަރެއްކަމުން، ރަށުގެ ޚަބަރުތައް އެނގޭނޭފަދަ ވެބްސައިޓެއް ފަރުމާކުރުމަކީ އަބަދުވެސް ދެކޭ ހުވަފެނެކެވެ. މި ހުވަފެނުގައި ކުލަ ނުޖެހި އޮތް ސަބަބުތައްވެސް ގިނައެވެ. އަޅުގަނޑަށް އެކަށީގެންވާ ހުސްވަގުތު މިކަމަށް ނުދެވުމާއި، މިހާތަނަށް ހެދި ބައެއް ވެބްސައިޓްތައް ކުރިޔަށް ނުގޮސް މަރުވެފައިވާތީ "ބޭކާރު" މަސައްކަތެއް ނުކުރާންވެގެން ހުރެވުނީއެވެ.
މިހެން ގޮސް ރައްޓެހިންތެރޭ މިވާހަކަ ދެކެވޭތާވެސް ދުވަސްގަނޑެއް ވެއްޖެއެވެ. ފަޔާޒް ސާރ އާއި ޤާއިމްއާއި އަދި ޙާތިމްވެސް މިފަދަ ސައިޓެއް ހަދައިފިނަމަ ހިނގާނެ ކަމުގެ ޔަޤީންކަން ދިންތާވެސް ދުވަސްގަނޑެއް ފަހުން، ރަށުގެ އިތުރު ޑިވެލޮޕަރެއް ކަމުގައިވާ ސުނީލު އައިސް ރަނގަޅު ތީމެއް ދެއްކިއެވެ. އަދި މިވެބްސައިޓް ހެދުމަށް ހިޔާލު ފާޅުކުރެވުނެވެ. އަޅުގަނޑު ހިތައް އެރީ ހެކަތަން އުސޫލުން އެއްދުވަހުން ގޮސް ކޮޅެއްގައި ޖައްސާފައި ނިންމާލުމަށެވެ. ކަންވީވެސް އެހެންނެވެ. ހޮނިހިރު ދުވަހެއްގައި އޮފީހަށް (ޖަވާބު ޕްރައިވެޓް ލިމިޓެޑަށް) ގޮސް ފަށައިގެން އެއްދުވަހުން 70 ނުވަތަ 80 އިންސައްތަ މަސައްކަތް ފުރިހަމަ ކޮށްލެވުނެވެ.
ދެން އިތުރަށް މިވާހަކަ އަލުން އާލާކޮށް ޙާތިމް މީގެ އެޑިޓަރކަން ނެގުމުން މި ހިނގާނެ ކަމުގެ އުއްމީދު ވަރަށް ބޮޑަށް އާލާވެއްޖެއެވެ. އިތުރު ހިތްވަރެއްލާ ބަކީ ހުރި މަސައްކަތްތައް ނުނިދާ އިނދެގެން ނިންމާލީ ވަރަށް ގިނަ ބައެއްގެ އެހީވެސް ލިބިގެންނެވެ. މިގޮތުން ޓެކްނިކަލް އެހީގެ ގޮތުގައި އެކުގައި މަސައްކަތްކުރާ އަތުފާނު ދިން އެހީ ފާހަގަ ކޮށް ޝުކުރު އަދާކުރަމެވެ. ހޮސްޓިންގެ ކަންކަމަށް ނުފަރިތަކަމުން އަތުފާނާއި އެބައި ހަވާލުކުރީމެވެ. ސާވަރ އެޑްމިނިސްޓްރޭޝަންއަށް އޭނާއަކީ ކުޅަދާނަމީހެކެވެ. ހުރިހާ ކަމެއް ކޮށް ނިންމާލަދިނެވެ. އިތުރަށް އަމިއްލައަށް ކަންކަން ހޯދައި މުޅި ސެޓްއަޕް ވަރަށް ފުރިހަމަކޮށްދިނެވެ.
ހަމަ އެހެންމެ ހާތިމް މިކަމާ ހަވާލުވެ، މި މަސައްކަތް ކޮޅަށްޖަހަން އަޒުމާއިއެކު ކުރި މަސައްކަތައްވެސް ވަރަށް ޝުކުރު އަދާކުރަމެވެ. އެފެންވަރުގެ މަސައްކަތެއް ނުފެނުން ނަމަ، އަޅުގަނޑަށް މިފަދަ ބުރަ މަސައްކަތެއް ނިންމުމުގެ ހިތްވަރެއްވެސް ނުލިބުނީސްކަން ޔަޤީނެވެ.
ހަމައެއާއިއެކު އެކި ގޮތްގޮތުން މި ސައިޓު ހިންގުމަށްޓަކައި ހިޔާލު ބަދަލުކޮށް، ފަންޑުކޮށް، ޤަވާއިދުތައް އެކުލަވާލާ، ލިޔުންތެރިކަމުގައި ބައިވެރިވެ، އަމަލީގޮތުން މިހިސާބަށް ގެންނަން އުޅުނު އެންމެހާ ހިންގުންތެރިންނަށް ވަރަށް ބޮޑު ޝުކުރެއް އަދާކުރަމެވެ.
ޝުކުރުގެ ލިސްޓުން އުނިކޮށް ނުލެވޭނެ އަނެއް ބަޔަކީ އަޅުގަނޑުގެ އޮފީސް ޖަވާބެވެ. މިހާ އަވަހަށް ސައިޓެއް ފަރުމާކޮށް ނިންމާލެވުނީ ޖަވާބުގައި ބޭނުން ކުރަމުންދާ "ކަސްޓަމައިޒްޑް ލަރަވަލް ސްކެލެޓަން" (މި ދިވެހި ކުރާނެ ގޮތެއް އަޅުގަނޑަކަށް ނޭންގެއެވެ) ގެ ސަބަބުންނެވެ. އެއީ ކޯއްޗެއްކަން ނޭންގޭ ބޭފުޅުންނަށް ބުނެލަދެވޭނީ އެއީ މިސައިޓުގެ މައިބަދައެވެ. ވީމާ މި ސްކެލެޓަން މިކަމަށް ޕްރޮވައިޑް ކޮށްދިން ކަމަށްޓަކައި ޖަވާބަށް ވަރަށް ބޮޑަށް ޝުކުރު އަދާކުރަމެވެ.
އަޅުގަނޑުގެ އުއްމީދަކީ މި ސައިޓުން ގިނަ ބަޔަކަށް ފައިދާކުރުމެވެ. އަދި އެންމެންވެސް އެމީހެއްގެ އެއްޗެއްކަމަށްދެކި މިކަމަށް އެހީވުމެވެ. މި ވެބްސައިޓް މިސްރާބު ހިފެހެއްޓުމަށް ހިންގުން ވަކި ބަޔަކާއި ހަވާލުވެފައި އޮތަސް، މައުލޫމާތު ޙިއްޞާކުރުމަށް އެދޭ އެންމެވެސް މިކަމުގައި ބައިވެރިވުމެވެ.
މި މަސައްކަތުގައި މާތް ﷲ ބަރަކާތްލައްވާށިއެވެ! އާމީން!
