ހުޅުދުއްފާރު ކައުންސިލްގެ 15ވަނަ ޤުރްއާން މުބާރާތުގެ ނަތީޖާ ފާޅުކުރުމުގެ ޙަފްލާ ބާއްވައިފިއެވެ. އެގޮތުން 16 އޮގަސްޓް 2025ވީ ހޮނިހިރު ދުވަހުގެ ރޭ ބޭއްވި ކުލަގަދަ ރަސްމިއްޔާތުގައި އެންމެ ޝަރަފުވެރި އިނާމު ޙާޞިލުކޮށްފައިވަނީ ހުޅުދުއްފާރު ސްކޫލުގެ ދަރިވަރު، މުޙައްމަދު އަލީފް (ސައިމާގެ / ރ. ހުޅުދުއްފާރު)އެވެ.
92 މާކުހާއެކު މުބާރާތުގެ އެއްވަނަ އޭނާ ހޯދާފައިވާއިރު މުޅި މުބާރާތުން ދެވަނަ ޙާޞިލުކޮށްފައިވަނީ އަމިއްލަގޮތުން ބައިވެރިވި، އިޙްތިޝާމް ޢަލީ ނާޡިމް (ސާރާޒް / ރ. ހުޅުދުއްފާރު)އެވެ. އިޙްތިޝާމަށްވެސް ލިބިފައިވަނީ 92 މާކުހެވެ. އެހެންކަމުން މުބާރާތުގެ 1ވަނަ ކަނޑައަޅާފައިވަނީ މުބާރާތުގެ ޤަވާއިދުގެ 15.2 ވަނަ މާއްދާގައި ބަޔާންކޮށްފައިވާ ފަދައިން ލަހުނު ޖަލީގެ ބައިން އެންމެ މަތިން މާރކްސް ލިބިފައިވާ ފަރާތަށް ވަނަ ލިބޭ އުޞޫލުންނެވެ. އިޙްތިޝާމް އަށް ލިބިފައިވަނީ ލަހުނު ޖަލީގެ ބައިން 44 މާރކްސް، ލަހުނު ޚަފީގެ ބައިން 30 މާރކްސް އަދި އަޑާއި ރާގުގެ ބައިން 18 މާރކްސްއެވެ. މުޙައްމަދު އަލީފަށް ލިބިފައިވަނީ ލަހުނު ޖަލީގެ ބައިން 45 މާރކްސް، ލަހުނު ޚަފީގެ ބައިން 30 މާރކްސް އަދި އަޑާއި ރާގުގެ ބައިން 17 މާރކްސް އެވެ.
މުޅި މުބާރާތުން ތިންވަނަ ޙާޞިލުކޮށްފައިވަނީ 90 މާކްސްއާއެކު، ހުޅުދުއްފާރު ސްކޫލުގެ ދަރިވަރު، ޔޫނުސް މުޙައްމަދު ނިސާމް (ނިޝާން / ރ. ހުޅުދުއްފާރު)އެވެ.
މި ޙަފްލާގައިވަނީ އެކި ޢުމުރުފުރާތަކުން (ކީ ސްޓޭޖުތަކުން) ވަނަވަނައަށް އައި ބައިވެރިންނަށާއި ބަލައިގެން ކިޔެވުމުގެ ގޮފިންނާއި ނުބަލާ ކިޔެވުމުގެ ގޮފިން ވަނަވަނައަށް އައި ދަރިވަރުންނަށް ޓްރޮފީއާއި ހަނދާނީ ލިޔުން ޙަވާލުކޮށްފައެވެ.
މި ޙަފްލާ ޝަރަފުވެރި ކޮށްދެއްވާފައިވަނީ މިނިސްޓްރީ އޮފް އިސްލާމިކް އެފެއާޒްގެ މިނިސްޓަރ އޮފް ސްޓޭޓް ފޯ އިސްލާމިކް އެފެއާޒް އަލްއުސްތާޛު ޢަބްދުލް ޢަޒީޒު ޖަމާލު އަބޫބަކުރެވެ.
ހުޅުދުއްފާރު ކައުންސިލްގެ ޤުރްއާން މުބާރާތްތަކުގެ ފެންވަރު ރަނގަޅުކޮށް، ހައިބަތުހުރި މުބާރާތަކަށް ހެދުމަށްޓަކާ އެ ކައުންސިލުން އަބަދުވެސް މަސައްކަތްކުރަމުންދާކަން ފާހަގަކޮށްލެވެއެވެ. އެގޮތުން މި ފަހަކުންވަނީ ކައުންސިލްގެ ޤުރްއާން މުބާރާތުގެ 1ވަނައަށް ދާ ފަރާތަކަށް ޢުމުރާ ދަތުރެއް ދޭ ގޮތަށް ހަމަޖައްސާފައެވެ.
މި އަހަރުގެ މުބާރާތުން އެކި އެކި ވަނަތައް ޙާޞިލުކުރި ބައިވެރިންނަށް ފާރު އެމް ވީގެ ފަރާތުން ވަރަށް ހޫނު މަރުޙަބާއެއް ދަންނަވަމެވެ.
