6 މޭ 2021ވީ ބުރާސްފަތި ދުވަހުގެ ރެއެވެ. ތަރާވީޙް ނަމާދު ނިންމާލުމަށްފަހު ރަޙްމަތްތެރި ކުދިންކޮޅަކާ އެކު މިސްކިތް ދޮށުގައި ވާހަކަދައްކާލަންތިބީމެވެ. ވާހަކައިގެ ތެރެއިން ކުއްލިއަކަށް ހޮޓަލަށް ދިއުމުގެ ވާހަކަ އައިއްސިއެވެ. ރަމަޟާންމަސް ނިމިގެންދާއިރު ހޮޓަލަށް އަރާލަންވާނެ ނޫންހޭ ބުނެ އެކަކުގެ ޚިޔާލުއައެވެ. ކޮންމެއަކަސް ދާން ނުދާން ކިޔަކިޔާފައި، އެންމެ ފަހުން ހޮޓަލަށް އަރާގޮތަށް ނިންމުމަށްފަހު، އެންމެން ގޮސް ހޮޓަލަށް އަރައިފީމެވެ.
ހޮޓަލަށްގޮސް މާގިނަ އިރެއްނުވެ، އެތަނުން އެއްކުއްޖަކު ފޯނު ބަލައިލުމަށް ފަހު، ސޯޝަލް މީޑިއާގައި ފެތުރިގެންދިޔަ ކުއްލި ޚަބަރު އެހެން އެންމެންނަށް ދައްކާލައިފިއެވެ. ކުރީގެ ރައީސް، އަދި ރައްޔިތުން މަޖިލީހުގެ މިހާރުގެ ރައީސް، މުޙައްމުދު ނަޝީދު ކާރުކޮޅަށް އަރާވަޑައިގަންނަވަނިކޮށް، އެމަނިކުފާނަށް އަމާޒުކޮށް އެތާ ކައިރިން އެއްޗެއް ގޮއްވާލި ވާހަކައެވެ.
އިރުކޮޅަކު ވާހަކައިގައި ތިބުމަށްފަހު ޝައިޚް އަބްދުﷲ ޝަހީދު ބުނުއްވިއެވެ. "ކޮން ފައިދާއެއް ލިބޭނެ ކަމަށް މީހަކު ކުރިކަމެއް ހެއްޔެވެ؟"
"މިއިން ގެއްލުމެއްނޫން ދެން ކޮންކަމެއް ވަކި ވާނީ؟" ޝައިޚް އިބްރާހީމް ރާފިޢު އިތުރުކޮށްލެއްވިއެވެ.
"އަސްލުވެސް. މި ކަހަލަ ކަމެއް ކުރުމުގެ ބޭނުމަކީ ވަކި ކޮބާ؟" ޝައިހް ޝަހީދު އަނެއްކާވެސް އިތުރު ކޮށްލެއްވިއެވެ.
ހަޤީޤަތުގައިވެސް ތެދެކެވެ. މިކަހަލަ ލާއިންސާނީ، ފިޑި އަމަލެއްގެ ބޭނުމަކީ ކޮބައިތޯއެވެ؟ ޙާޞިލުކުރަން ބޭނުންވާކަމަކީ ކޮބައިތޯއެވެ؟
ސިޔާސީ ފައިދާއަށް ކުރިކަމެއްތޯއެވެ؟ އެހެންކަމުގައިވާނަމަ، އެކަމުގެ ހައްލު އެބައޮތެވެ. ރައްޔިތުންގެ ތާއީދު ހޯދާށެވެ. ރައްޔިތުން ވޯޓުން އެކަން ކޮށްދޭނެއެވެ.
ދެންއޮތީ ދީނީ ޚިޔާލު ތަފާތު ވުމުގެ ވާހަކައެވެ. ދައްކަން ފާޑެއްގެ ވާހަކައަކަސް ދެއްކުން މުޙިއްމު ވާހަކައެއް ވީމާ، ދަންނަވާލާނަމެވެ.
ކަންދިމާ ކުރި ގޮތުން އެ ހާދިސާގެ ވާހަކައިގެ ޚަބަރު އަޅުގަނޑުމެންނަށް ލިބުންއިރު އެއް މޭޒެއްގައި ދެ ޝައިޚުން ތިއްބެވިއެވެ. ދަންނަވަންތޯއެވެ. މި ދެ ޝައިޚުންނަކީވެސް ދީނީ ބައެއް ކަންކަމުގައި ރައީސް ނަޝީދުއާ ޚިޔާލު ތަފާތުވާނެ ދެ ބޭފުޅުންނެވެ. އެހެންނަމަވެސް އެ ދެބޭފުޅުންގެ ޚިޔާލު ކުރިން މި ބަޔާން ކުރީއެވެ. މި ފަދަ ޢަމަލަކަށް ދެކޮޅު ކަމެވެ. ކޮށްގެން ވާނެ ކަމެއް ނޫންކަމުގައި ބަޔާންކުރެއްވިއެވެ.
ވީއިރު ދީނުން ވަރަށް ކުޑަ ކުޑަ މިންވަރެއް އެނގިގެން އުޅޭ ބައެއް "އާންމުން" މިފަދަ ހަރުކަށި ނިންމުން ނިންމާ ކަމީ އަޅުގަނޑުމެން އެކަމާ ވިސްނަންޖެހޭ ކަމެކެވެ.
އަނިޔާވެރިކަމަކީ އިންސާނީ ޠަބީއަތުގައި ލައްވާފައިވާ ކަމެވެ. ރުޅިއަންނަ ހިނދު، މާޔޫސްވާ ހިނދު، އުންމީދު ގެއްލޭ ހިނދު، އަނިޔާވެރިކަން އިސްކުރުމަށް އިންސާނާގެ ތަބީޢަތް މަސައްކަތްކުރެއެވެ. ނަމަވެސް، މި ކަހަލަ ކޮންމެ ނުރަނގަޅު އިޙްސާސެއް ފުރިހަމައަށް ކޮންޓުރޯލު ކުރުމުގެ ބާރު ވަނީ އިސްލާމް ދީނުގައި ބަޔާން ކޮށްދެއްވާފައެވެ.
އަޅުގަނޑުމެންގެ ތެރޭގައި ތަފާތު ފިކުރުގެ، ތަފާތު ވިސްނުމުގެ މީހުން އުޅޭތީ ދަންނަވާލަމެވެ. އަޅުގަނޑުމެން އެންމެންވެސް އެއްގޮތްވާ ކަމެއް އެބައޮތެވެ. އަޅުގަނޑުމެން އެންމެންނީވެސް އިންސާނުން ނޫންތޯއެވެ؟
އެހެން ކަމުގައިވާނަމަ، އެ އިންސާނިއްޔަތުކަން ހުންނަންވާނެ ނޫންތޯއެވެ؟ ކޮންމެ ކަމެއްގައިވެސް އެ އިންސާނިއްޔަތުކަން އިސްކުރަންވާނެ ނޫންތޯއެވެ؟
މުޖުތަމަޢު އިސްލާހު ކުރަން މަސައްކަތް ކުރަންވީއެވެ. އަނެކުންނަށް އިޚްތިރާމުކުރާ ހާލު، ރަނގަޅުގޮތްވެސް ބަޔާން ކޮށްދެންވީއެވެ.
އަޅުގަނޑުމެން ހިތްހަމަ ނުޖެހޭ މީހުން މުޖުތަމަޢުގައި އުޅޭނެއެވެ. އަޅުގަނޑުމެންގެ ވިސްނުމާއި، ފިކުރާއި ތަފާތު މީހުންވެސް މުޖުތަމަޢުގައި އުޅޭނެއެވެ. އެހެން ކަމުން އެންމެން އެއްކޮށް އުޅެން ދަސްކުރަން އެބަޖެހެވެ. އަޅުގަނޑުމެންގެ ދަރިންނާއި، އެ ދަރިންގެ ދަރިންނަށްޓަކައިވެސް މެއެވެ. އެކުދިންގެ ކުރިމަގަށްޓަކައެވެ. އަޅުގަނޑުމެންގެ މި ލޯބިވާ ޤައުމަށްޓަކައިވެސް މެއެވެ.
