ރަށު ކަޕް 2025ގެ ފައިނަލް މެޗް މިރޭ، ހުޅުދުއްފާރު ފުޓްސަލް ދަނޑުގައި އޮންނާނެއެވެ. އެއްކޮޅުން މިދިޔަ އަހަރުގެ ޗެމްޕިއަންސް ބަދަހި އެފް.ސީ ބައްދަލުކުރާއިރު އަނެއްކޮޅުން ބައްދަލުކުރާނީ ވޮލްފް ސިޓީއެވެ.
ބަދަހި އެފް.ސީ ފައިނަލްގެ ޖާގަ ކަށަވަރުކުރީ ގްރޫޕް ސްޓޭޖްގެ ދެވަނަ ހޯދާ، ސެމީ ފައިނަލްގައި ލިނެކްއާ ބައްދަލުކޮށް 4:0ގެ ބޮޑު ތަފާތަކުން މެޗް ކާމިޔާބުކޮށްގެންނެވެ.
ވޮލްފް ސިޓީ ފައިނަލްގެ ޖާގަ ހޯދީ ގްރޫޕް ސްޓޭޖުގެ އެއްވަނަ ޓީމްގެ ގޮތުގައި އޮވެ ސެމީއަށް ދަތުރުކުރުމަށްފަހު، ގަރާޖް އެފް.ސީއާ ބައްދަލުކޮށް 2:0ގެ ނަތީޖާއަކުން ސެމީގައި މޮޅުވެގެންނެވެ.
ބަދަހި އެފް.ސީއަކީ ތަޖުރިބާކާރު ގިނަ ކުޅުންތެރިންތަކެއް ތިބި ޓީމެކެވެ. އެގޮތުން ނިމިދިޔަ ރ. ވެޓްރަންސް ކަޕްގައި ކުޅުނު ހުޅުދުއްފާރު އެފް.ސީގެ ކީޕަރު ސިރާޖު ހުރީ ބަދަހި އެފް.ސީގައެވެ. އަދި އެ ޓީމްގެ ޖާޒީ ނަންބަރު 8 އަޙްމަދު ޝުޖާޢުއަކީ އެ މުބާރާތުގައި ކުޅުމުގެ އިތުރުން މިދިޔަ އަހަރުގެ ރަށު ކިންގްވެސް މެއެވެ. ޖާޒީ ނަންބަރު 5 އިބްރާހީމް ނަސީމްއަކީވެސް ވެޓްރަންސް ކަޕްގައި ކުޅެފައިވާ ކުޅުންތެރިއެކެވެ. ނަމަވެސް އެ މުބާރާތުގެ ކުޅުމުގެ ތެރޭގައި އިބްރާހީމް ނަސީމުއަށް ލިބިފައިވާ އަނިޔާ އެއްކޮށް ރިކަވަރ ވެފައި ނުވާތީ ބަދަހި އެފް.ސީގެ އެއްވެސް މެޗެއްގައި ނަސީމްގެ ކުޅުމެއް އަދި ނުފެނެއެވެ.
އަނެއްކޮޅުން ވޮލްފް ސިޓީގައި ތިބީ ވަރަށް ޒުވާން ކުޅުންތެރިންތަކެކެވެ. ނަމަވެސް އެ ޓީމްގެ ޖާޒީ ނަންބަރު 10 މުޙައްމަދު އަލީފްއަކީ ހުޅުދުއްފާރު ސީނިއާ ޓީމުން އަބަދުވެސް ޖާގަ ހޯދަމުން އަންނަ ހުނަރުވެރި ކުޅުންތެރިއެކެވެ. މީގެ އިތުރުން އެ ޓީމްގެ ޖާޒީ ނަންބަރު 30 އަޙްމަދު އަހްނަފްއަކީވެސް ހުނަރުވެރި މޮޅު ކުޅުމެއް ދައްކަމުން އަންނަ ކުޅުންތެރިއެކެވެ.
ބަދަހި އެފް.ސީ އަދި ވޮލްފް ސިޓީއަކީ މުބާރާތުގެ ގްރޫޕް ސްޓޭޖްގައި ގްރޫޕް ބީގައި ހިމެނުނު ދެ ޓީމެވެ. އެހެންކަމުން ފައިނަލް މެޗަކީ މި ޓީމް މި މުބާރާތުގައި ބައްދަލުކުރާ ދެވަނަ މެޗެވެ. ގްރޫޕް ސްޓޭޖްގައި ކުޅެވުނު މެޗު ނިމިފައިވަނީ 1:1ގެ ނަތީޖާއަކުން ދެޓީމު އެއްވަރު ވެގެންނެވެ.
ވޮލްފް ސިޓީއަކީ މިފަދަ ބޮޑު މުބާރާތަކުން އަލަށް ފައިނަލަށް ދަތުރުކުރި ޓީމެކެވެ. އެހެންކަމުން އެމީހުންގެ އެންމެ ބޮޑު އުންމީދަކަށްވާނީ މިއަހަރުގެ ރަށު ކަޕް ޗެމްޕިއަންކަން ނެގުމެވެ. އަނެއްކޮޅުން ބަދަހި އެފް.ސީގެ އެންމެ ބޮޑު އުންމީދަކަށް ވާނީ ތަށި ދިފާޢުކުރުމެވެ.
