އިމާމާއަށް ކުށެއް ކުރެވުމުން ސުބްޙާނަﷲ ކިޔުމުގެ ބަދަލުގައި ކަނބަލުން ކަންތައް ކުރަންޖެހޭ ގޮތަކީ އެއްއަތުން އަނެއް އަތުގައި ޖަހާލުމެވެ. މިކަމުން ދޭހަވަނީ އެކަނބަލުންގެ އަޑަކީވެސް އެއާމެދު ރައްކާތެރިވާން ޖެހޭ އެއްޗެއްކަމެވެ. ވީއިރު ހިލޭފިރިހެނުންގެ ކުރިމަތީގައި ލަވަކިޔުންފަދަ ކަންތައްތައް ކުރުން ތިޔަ ކަނބަލުންނަށް ހުއްދަވާނެކަމަށް ގަބޫލުކުރަނީ "ކޮން ހަމައަކުން ހެއްޔެވެ؟"
އެކަލާނގެ ގެކޮޅުތަކުގައި، ފިރިހެނުންގެ ފަހަތުގައި ނަމާދު ކުރާއިރު ތިބެންޖެހޭނީ ފިރިހެނުންނަށް ފަރުދާވެގެންކަން ތިބާ ގަބޫލު ކުރަމެވެ. ވީއިރު ބޭކާރު ކަންކަމުގައި ގެއިން ނިކުމެ، އެއްވެސް ހައްދެއްނެތި ހިލޭ ފިރިހެނުންނާއި މަސްހުނިވެ އުޅުމާއި، ހިލޭފިރިފެނުންގެ ކުރިމަތީގައި ނެށުންފަދަ ކަންތައްތައް ކުރުން ހުއްދަވާނެ ކަމަށް ތިބާ ގަބޫލުކުރަނީ "ކޮން ހަމައަކުން ހެއްޔެވެ؟"
ތިބާ ޚަލްޤު ކުރައްވައި، ތިބާގެ ހަށިގަނޑުގެ ހުރިހާ ސިއްރުތަކެއް މޮޅަށް ދެނެވޮޑިގެންވާ އިލާހުގެ ކުރިފުޅުމައްޗަށް ނަމާދަށް ހުއްޓި ހުންނަންވާނީ، ނިވައިކަންބޮޑު، ގަޔަށްދޫ ހެދުމެއްގައިކަން ތިބާ ގަބޫލު ކުރަމެވެ. ވީއިރު ތިބާގެ ވަނާތައް ފަޅުވާފަދަ ގަޔަށްބާރު، ތުނި ހެދުންތަކުގައި ހިލޭފިރިހެނުންގެ ކުރިމައްޗަށް ނިކުމެ އުޅުން ހުއްދަވާނެ ކަމަށް ތިބާ ގަބޫލުކުރަނީ "ކޮން ހަމައަކުން ހެއްޔެވެ؟"
މޫނުބުރުގާގެ ވާހަކަ ދެކެވޭ ކޮންމެ ފަހަރަކު، އަންހެނާގެ އައުރައަކީ "މޫނާއި ދެއަތްތިލަ" ނޫންހައި ތަނެކޭ ބުނެ ތިބާ ބަހުސް ފަށަމެއް ނޫން ހެއްޔެވެ؟ ފައިތިލަ އަކީވެސް އަންހެނާގެ އައުރައެއްކަން ތިބާއަށް އެނގެއެވެ. އެހެންކަމަށް ވާއިރު ފައިގެ ބައްޓަން އެނގޭފަދަ ބާރު އެއްޗެހި ލައިގެން، ތަބިކަށިން ބަޔަކާއެކު ފައިތިލަ ކަޝްފުކޮށްގެން އުޅެވޭނެކަމަށް ތިބާ ގަބޫލުކުރަނީ "ކޮން ހަމައަކުން ހެއްޔެވެ؟"
ލޮބުވެތި އުޚްތުންނޭވެ! ތިޔަ ކަންބަލުންގެ އައުރައާމެދު ﷲ އަށް ބިރުވެތިވާށެވެ. ތިޔަ ކަނބަލުންނަށް މިނިވަންކަމާއި އަންހެނެއްގެ ހަގީގީ ދަރަޖަ ދެއްވީ އިސްލާމްދީނެވެ. ވީއިރު ދުނިޔޭގެ ކެހިވެރި ކަމުގައި ޖެހި އައުރަ ނީލަންކިޔަމުން ނުދާށެވެ. އިސްލާމް ދީނުގައި ހެދުންއެޅުމަށް އަންގަވާފައިވާ މިންގަނޑަކީ "ކަޓު" ކަމެއްކަމަށް ދެކޭމީހާ މާދަމާ ނަރަކައިގެ "ހޮޓުކަން" ދެކޭނެތެވެ.
ލޮބުވެތި އަޚުންނޭވެ! ތިޔަބައިމީހުންގެ ބެލުމުގެ ދަށުގައިވާ އުޚްތުންނާމެދު ﷲ އަށް ބިރުވެތިވާށެވެ. ދައްޔޫސުންގެ ތެރެއިން ނުވާށެވެ. ތިބާގެ ބެލުމުގެ ދަށުގައިވާ މީހުންނާމެދުު "މާާާދަަމާ" ތިބާއާ ސުވާލު ކުރެވޭނެކަން ދަނެ ބިރުވެތިވާށެވެ.
