ހިނިތުންވެލާށެވެ. މިއީ އެއްވެސް ޚަރަދެއް ނުކޮށް ދެވޭ ޞަދަޤާތެކެވެ.
ރާއްޖޭގެ އެކި ރަށްރަށަށް ކުރެވުނު ދަތުރުތަކުގައި އަޅުގަނޑުގެ ކެމެރާގެ ލެންސު އެންމެ ބޮޑަށް އަޅައިގަންނަ އެއް މަންޒަރަކީ ރައްޓެހިންނާއި ބީރައްޓެހިންގެ މޫނުމަތިން ފެންނަ ހިނިތުންވުމެވެ. އެހެންކަމުން މި ހަފްތާގައި މި ހިއްސާކޮށްލަނީ އެގޮތަށް އަޅުގަނޑަށް އެންމެ ބޮޑަށް ކަމުދިޔަ ބައެއް ހިނިތުންވުންތަކެވެ.
ހިނިތުންވާން ވަކި ސަބަބެއް ބޭނުންވޭ ހެއްޔެވެ؟ ފޮޓޯއަށް ރަނގަޅަށް ބައްލަވާށެވެ.
ބުރަ މަސައްކަތުގެ ތެރެއިން ފެންނަ ހިނިތުންވުމުގައި އަސްލީކަމެއް ފާހަގަވެއެވެ.
މިފޮޓީ ބަލާމީހާގެ މޫނަށްވެސް ހިނިތުންވުމެއް ނުގެނެސްދޭ ހެއްޔެވެ؟
ނަބިއްޔާ ޞައްލަﷲ ޢަލައިހި ވަސައްލަމްގެ ޙަދީޘްފުޅެއްގައިވެއެވެ. "ހިނިތުންވެ އުޖާލާވެފައިވާ މޫނު ދެކެ އަރަހުށި ﷲ ލޯބިވެ ވޮޑިގަންނަވައެވެ."
އިބްނު ޢުމަރު އެކަލޭގެފާނުގެ ދަރިންނަށް ވަޞިއްޔަތް ކުރައްވަމުން ވިދާޅުވިއެވެ. "ލޯބިވާ ދަރީންނޭވެ! ހަމަކަށަވަރުން ހެޔޮ ކަމަކީ ވަރަށް ފަސޭހައިން ކުރެވިދާނެ ކަމެކެވެ. ހިނިތުންވެގެންވާ މޫނަކުންނާއި މަޑުމައިތިރި ބަހަކުންވެސް މެއެވެ."
ބުރަ މަސައްކަތުގެ ތެރެއިން ހިނިތުންވުމުން ދެދުނިޔޭގައިވެސް އޭގެ ފައިދާ ލިބެއެވެ.
އިބްނު ޢުޔައިނާ ވިދާޅުވެފައިވެއެވެ. "ހިނިތުންވުމަކީ ހިތްތައް ހިފާ ދައްޗެވެ."
ހިނިތުންވުމަކީވެސް ﷲ ދެއްވާފައިވާ ބޮޑު ނިޢުމަތެކެވެ.
ހިނިތުންވުމުން ތިމާއަށާއި އަނެކުންނަށް ގެނެސްދޭނީ ހިތްހަމަޖެހުމެވެ.
މިފޮޓޯއިން ތިޔަ ފެނިވަޑައިގަންނަވަނީ ރާއެރުމުގެ މަސައްކަތުގެ ތެރެއިން ރާވެރިއެއްގެ ހިތްގައިމު ހިނިތުންވުމެއްގެ ފޮޓޯއެކެވެ.
ބޯވާގެ ފޮޓޯ ރީއްޗަސް، ހިނިތުންވުމުން މިފޮޓޯގެ ފުރިހަމަކަން އިތުރުކޮށްދީފިއެވެ.
ސޯޝަލް މީޑިޔާއިން އަޅުގަނޑު ފޮލޯ ކުރައްވާ ބޭފުޅުންނަށް ބުޅި ހަދާ ސައްތާރުބޭގެ ހިނިތުންވުން އަލެއް ނުވާނެއެވެ.
އަބަދުވެސް ހިނިތުންވާށެވެ.
