ދިވެހިންނަކީ މަސްވެރިކަމުގެ ދަރިންނެވެ. ކުރީގައި ފަތިހު ފަތިހާ މަހަށް ފުރައިގެން ގޮސް، އިރުއޮއްސި އަނދިރިވާން ވާއިރަށް ރަށަށް އަރަން ޖެހެއެވެ. މިހާރު ހަވީރު ދަޅައަށް ރަށު ގޮނޑުދޮށަށް ނުކުމެ ދޮށިއެއްލަން މަސްވެރިން އުޅޭ މަންޒަރަކީ ޢާއްމު މަންޒަރެކެވެ. އަދި މިއީ އިރު އޮއްސެމުން އުދަރެސް މައްޗަށް ތަފާތު ކުލަތައް ގެންނަމުން ދާއިރު ވަކިން ރީތިވާ މަންޒަރެކެވެ. އަނދިރިވެ ރަތްވިލާ އޮއްސެންވާއިރަށް މަހެއް ހިފައިގެން ގެއަށްދިޔުމަކީ ގިނަ މަސްވެރިންގެ މަގްސޫދެވެ.
