ކޮވިޑްގެ މި ޙާލަތުގައި، ހުޅުދުއްފާރު މޮނިޓަރިންގައި ގިނަ ދުވަސްތައެއް އޮތުމުން، ހުޅުދުއްފާރު ރައްޔިތުންނަށް އެހީތެރިކަމެއް ދިނުމުގެ ގޮތުން، އަނގޮޅިތީމު ރައްޔިތުންގެ ފަރާތުން، ހުޅުދުއްފާރުގެ ރައްޔިތުންނަށް 1 ޓަނު މަސް ހަދިޔާ ކޮށްފިއެވެ.
އަނގޮޅިތީމު ކައުންސިލުގެ ނައިބު ރައީސް، މުޙައްމަދު ޝާހީނު، ވިދާޅުވީ މިއީ އަނގޮޅިތީމު ޒުވާނުންގެ އިސްނެގުމުގެ މަތިން، އަނގޮޅިތީމު ރައްޔިތުންގެ އެއްބާރުލުމާއެކު ހިންގުނު ހަރަކާތެއް ކަމުގައެވެ. އަދި މަޤްސަދަކީ ހުޅުދުއްފާރަށް ދިމާވެފައި މިވާ ދަތި އުނދަގޫ ދަނޑިވަޅުގައި، އަވައްޓެރި އަނގޮޅިތީމުގެ ފަރާތުން ކުޑަނަމަވެސް ލުޔެއް، ހުޅުދުއްފާރުގެ ރައްޔިތުންނަށް ފޯރުކޮށްދިނުން ކަމުގައެވެ.
ހުޅުދުއްފާރުގެ ރައްޔިތުންނަށް މި ހަދިޔާ ކުރި 1 ޓަނު މަހަކީ ފެށުމެއްކަމަށާއި، އަދިވެސް ވީ ވަރަކުން މިކަހަލަ ހަރަކާތްތައް ކުރިއަށް ގެންދާނެ ކަމުގައި ޝާހީން ވިދާޅުވިއެވެ. އަދި ހަމަ އެހެންމެ މިވަގުތު މޮނިޓަރުންގެ ހާލަތުގައިއޮތް ރ. ދުވާފަރަށް އެހީތެރި ކަމެއް ފޯރުކޮށްދިނުމުގެ ގޮތުން، ދުވާފަރު ރައްޔިތުންނަށް ކާށި ހަދިޔާ ކުރުމަށް މިއަދު އަނގޮޅިތީމު ރައްޔިތުންގެ ފަރާތުން ދުވާފަރަށް ދިއުމަށް ހަމަޖެހިފައިވާ ކަމުގައިވެސް ޝާހީނު ވިދާޅުވިއެވެ.
އަދި މިކަމުގައި އަނގޮޅިތީމު ރައްޔިތުންގެ ފަރާތުން ލިބުނު ފުރިހަމަ އެއްބާރުލުމަށް ނިހާޔަތައް ޝުކުރު ދަންނަވާކަމުގައިވެސް ޝާހީނު ވިދާޅުވިއެވެ.
ނިސްބަތުން ކުޑަ އާބާދީއެއް އޮންނަ އަނގޮޅިތީމުން މިދެއްކި ރިވެތި ނަމޫނާއަކީ އަޅުގަނޑުމެން އެންމެންވެސް ބަލައިގަނެ، އެއިން ޢިބުރަތެއް ޙާސިލުކުރެވޭނެ ކަމެކެވެ. މާތް ﷲ އަނގޮޅިތީމުގެ ލޮބުވެތި ރައްޔިތުންގެ މި ޢަމަލުގައި ބަރަކާތްލައްވާ، މި ކަން ކުރުމުގައި އިސްވެ އުޅުއްވި ހުރިހާ ބޭފުޅުންނަށް ހެޔޮ ރަޙްމަތް މިންވަރު ކުރައްވާށިއެވެ.
