ހުޅުދުއްފާރު ކައުންސިލާއި ހުޅުދުއްފާރު ޕޮލިސް ޕޯސްޓު ގުޅިގެން ޓުރެފިކާއި ގުޅޭ ސެޝަނެއް ކުރިއަށް ގެންގޮސްފިއެވެ.
ރ.ހުޅުދުއްފާރު ކައުންސިލާއި ރ.ހުޅުދުއްފާރު ޕޮލިސް ޕޯސްޓު ގުޅިގެން ކުރިއަށް ގެންދިޔަ މިސެޝަނަކީ ޓުރެފިކު ގަވާއިދަށް ރައްޔިތުން އަހުލުވެރިކުރުވުމަށާއި، ރ.ހުޅުދުއްފާރު ކައުންސިލުން އެންމެ ފަހުން ބޭއްވި ލައިސަންސް ބުރުގައި ބައިވެރިވި ފަރާތްތަކަށް ލައިސަންސް ފޮތް ދޫކުރުމަށް ބޭއްވި ސެޝަނެކެވެ.
މިސެޝަން ތަޢާރަފްކޮށްދެއްވީ ހުޅުދުއްފާރު ކައުންސިލްގެ ރައީސް މުޙައްމަދު އާތިފެވެ. އެއަށްފަހު ޓުރެފިކު ގަވާއިދުތަކާއި ގުޅޭގޮތުން މަޢުލޫމާތު ދެއްވީ ސީނިއަރ ސާރޖެންޓު އަޙްމަދު ޢަޒުމީއެވެ.
މިސެޝަންގައި، އެކްސިޑެންޓުތައް ހިނގަން މެދުވެރިވާ ސަބަބުތަކާއި އެކަންކަން މަދުކުރުމަށް ފަރުދީގޮތުން ކުރެވިދާނެ ކަންކަމާއި ޓުރެފިކު ގަވާއިދުތަކަށް އައިސްފައިވާ މުހިންމު އިސްލާހުތަކުގެ މަޢުލޫމާތުތަކުގެ އިތުރުން ބައިވެރިންގެ ސުވާލުތަކަށް ޖަވާބު ލިބިގެންދިޔައެވެ.
އެއަށްފަހު އޮތީ، ހުޅުދުއްފާރު ކައުންސިލުން އެންމެ ފަހުން ބޭއްވި ލައިސަންސް ބުރުގައި ބައިވެރިވެ އަލަށް ލައިސަންސް ލިބުނު ފަރާތްތަކަށާއި ލައިސަންސް އާ ކުރި ފަރާތްތަކަށާއި ކެޓަގަރީ އިތުރުކުރި ފަރާތްތަކަށް ލައިސަންސް ފޮތް ދޫކުރުމެވެ.
ލައިސަންސް ނަގަން ބޭނުންވާ ގިނަ ބަޔަކު ތިބި ނަމަ، ރަށުގައި ތިބެގެން ލައިސަންސް ނެގޭނެ ފުރުޞަތު ހުޅުދުއްފާރު ކައުންސިލުން ފަހިކޮށްދެއެވެ.
