އަހަރެންގެ އުމުރުން މިހާރު ތިރީސް ފަސް އަހަރުވީއެވެ. އަދިވެސް އަހަރެންނަށް ކައިވެނި ކުރާނެ ރަނގަޅު ބައިވެރިއަކު ނުލިބެއެވެ. އަމިއްލަ ގެދޮރެއް ނެތެވެ. އަދާކުރާ ވަޒީފާއިން ކިރިޔާ ކައިގެން ބޮއެގެން އުޅެވެނީއެވެ. އަހަރެން ހިނގާފައިދާއިރު ދުރުގައި ތިބެގެން މަލާމާތްކޮށް ހެނީކަމަށް އަހަރެންނަށް އިހްސާސްކުރެވެއެވެ. އަހަރެންގެ ޙަޔާތުގައި އެއްވެސް ކަމެއް ބޭނުންވާ ގޮތަކަށް ނުވެއެވެ. އަހަންނަކީ ވަރަށް ބަދު ނަޞީބު މީހެކެވެ. އެއްދުވަހަކު އަހަރެން ދެ ކިޑްނީ ހަލާކުވެ ބަލިއެނދުގައި ދުވަސްތައް ގުނަމުންދާ ބަލި މީހަކަށް ޒިޔާރަތް ކުރީމެވެ. ބަލި އެނދުގައި އޮތް އިރުވެސް އޭނާގެ ލޮލުން އުންމީދުގެ ވިދުވަރު އަހަރެން ދުށީމެވެ. އޭނާގެ ހިތްވަރުގަދަ ބަސްތަކުން އަހަރެން އަންތަރީސްވިއެވެ. އެ ހާލުގައި އޮތްއިރު ވެސް އޭނާގެ އުއްމީދަކަށް، ޢަޒުމަކަށް، ހިތްވަރަކަށް ބަދަލެއް ނާންކަން އެނގުމުން، އަހަރެންގެ އަމިއްލަ ނަފުސާމެދު ވިސްނާލުމަށް މަޖުބޫރުވިއެވެ.
ކުޑަކުޑަ ކަމެއް ބޮޑުކަމެއްކަމަށް ދެކި އެކަމުގެ އަސަރު އެތަކެއް ހަފުތާތަކަކަށް ނުވަތަ މަސްތަކަކަށް ދެމިގެންދިއުމަކީ ނައްސި ވިސްނުމެވެ. ނައްސި ވިސްނުމުގެ ސަބަބުން ތިބާގެ އުފާވެރިކަން މުޅީން ގެއްލި ކަންބޮޑުވުމާއި، ހާސްކަމުގެ ތެރެއަށް ވައްޓާލައެވެ. ޖިސްމާނީގޮތުންނާއި، ޖަޒުބާތީގޮތުން ނަފުސު ބަލިކަށިކޮށްލައެވެ. އަމިއްލަ ލަނޑުދަނޑިތައް ހާޞިލުކުރުމަށް އޮންނަ އަޒުމް ނެތިގެން ގޮސް ކަންނެތް ކުރުވައެވެ. އިޖުތިމާޢީ ހަރަކާތްތަކުން އެކަހެރިވެ، އެކަނިވެރިޔަކަށް ބަދަލުވެއެވެ. އެހެންކަމުން ނައްސި ވިސްނުންތަކުން ސަލާމަތްވުމަށް އެޅެން ހުރި އެންމެހާ ފިޔަވަޅުތަކެއް ވީހާވެސް އަވަހަކަށް އެޅުމަކީ ނުހަނު މުހިއްމު ކަމެކެވެ.
ނައްސި ވިސްނުންތަކުން ދުރުހެލިވުމަށް އަމަލުތައް ބައްޓަންކުރަންވީ ގޮތް
- - ޝުކުރުވެރިވާށެވެ.
ކޮންމެ ދުވަހަކުވެސް ފަތިސްނަމާދަށްފަހު ހެނދުނުގެ ޒިކުރުތައް ކިޔުމަށްފަހު، ތިބާއަށް ލިބިފައިވާ ނިޢުމަތްތައް ގުނާލުމަށް ފަސްވަރަކަށް މިނިޓް ހޭދަކޮށްލާށެވެ. ތިބާއަށް ނުލިބިވާ ކަންކަމަށްވުރެ، ލިބިފައިވާ ނިޢުމަތްތައް ކިހާ ގިނަކަން އަންދާޒާކުރެވުމުން، އެކަންކަމުގެ އަގުވަޒަންކުރެވި ޝުކުރުވެރިވުމަށް އާދަވާނެއެވެ. ޝުކުރުވެރިވުމަކީ ތިބާގެ ދުވަހީ އުފާވެރިކަން އެތައް ގުނައެއް އިތުރުކޮށްދޭނެ ކަމެކެވެ.
- - އަމިއްލަ ނަފުސަށްޓަކައި ވަގުތުކޮޅެއް ހޭދަކުރާށެވެ.
އަމިއްލަ ނަފުސުގެ ކުރިއެރުމަށް ނުވަތަ ހިތްހަމަޖެހުމަށް ވަގުތުކޮޅެއް ހުސްކުރާށެވެ. އެގޮތުން އެންމެ ކިޔާ ހިތްވާ ބާވަތުގެ ފޮތެއް ކިޔާލެވިދާނެއެވެ. ނުވަތަ ޤުރުއާނުގެ ތަރުޖަމާ ނުވަތަ ތަފްޞީރުން ކޮންމެވެސް މިންވަރެއް ކިޔާލުމަކީ ވެސް ނަފުސަށްޓަކައި ކޮށްލެވިދާނެ ކަމެކެވެ. ވަރަށް ގިނަފަހަރު އަމިއްލަ ނަފުސަށް އަޅާލުމަށް އެއްވެސް ކަމެއް ދެމެހެއްޓެނިވި ގޮތެއްގައި ނުކުރެވެއެވެ. އެހެންކަމުން ނައްސި ވިސްނުންތަކުން އަރައިގަތުމަށް ކޮންމެ ދުވަހަކުވެސް އެންމެ ކުޑަމިނުން ފަނަރަ މިނިޓް އަމިއްލަ ނަފުސަށްޓަކައި ހިތްހަމަޖެހުން ލިބޭކަމެއް ކުރުމުގައި ހޭދަކުރާށެވެ.
- - އިތުބާރުކުރެވޭ ރަޙްމަތްތެރިއަކާ ހިއްސާކުރާށެވެ.
ތިބާގެ އިހްސާސްތަކަށް ޤަދަރުކުރާ ފަހި ވިސްނުން ހުރި ރަޙްމަތްތެރިއަކާއި ވާހަކަދައްކާލާށެވެ. އަދި ތިބާގެ ނައްސި ވިސްނުން އޭނާ އާއި ހިއްސާކޮށް ޚިޔާލު ބަދަލުކޮށްލާށެވެ. އަމިއްލަ ސިކުނޑިއަށް ވަރަށް ބޮޑަށް ލުއި ލިބިގެންދާނެއެވެ. މިފަދަ ފިކުރުތައް ހިއްސާކުރުމަށް ޚިޔާރުކުރަންވާނީ ސިއްރު ހިފެހެއްޓޭފަދަ ގާތް ރަހްމަތްތެރިންނެވެ.
- - ތިބާގެ އިހްސާސްތަކަށް ޤަދަރުކޮށް އެކަމާ ކުރިމަތިލާށެވެ.
ހިތާމަތަކާއި ކުރިމަތިލާން ޖެހުމުން އެ އިހްސާސްތަކަށް ޤަދަރުކުރާށެވެ. ކަރުނަޔާ ހިތާމަތަކަކީ ދާއިމީ އެއްޗަކަށް ނުހެދުމަށް އެ ކަމެއްގެ ވަގުތުގައި އެ އިހްސާސްތައް ބޭރުކޮށްލާށެވެ. ހިތާމައެއް ކުރިމަތިވުމުން ހިތްހަމަޖެހެން ދެން ރޯލާށެވެ. އެޔަށްފަހު ކަރުނަ ފޮހެލާ އެކަމަކާ ފަހި ވިސްނުމަކާއެކު ކުރިމަތިލާށެވެ. ތިބާގެ އިޚްތިޔާރުގައި ނުވާކަމެއް ކިތަންމެ ކަރުނަޔެއް އެޅިނަމަވެސް ބަދަލު ނުކުރެވޭނެކަން ދަންނާށެވެ. ދުނިޔޭގެ ޙަޤީޤަތްތަކަށް ލޯ ހުޅުވާށެވެ.
- - އިޖުތިމާޢީ ގުޅުންތައް ބަދަހިކުރާށެވެ.
އާއިލީ އެއްވުންތައް އިންތިޒާމުކުރާށެވެ. ކޮންމެ ހުކުރު ދުވަހެއްގެ މެންދުރު މުޅި އާއިލާ އެކުގައި ކެއުމަށް ތާވަލުކުރާށެވެ. މަހަކު އެއްފަހަރު އާއިލާގެ ގޭގެއަށް ޒިޔާރަތް ކުރާށެވެ. ރަށުގެ ތަރައްޤީއަށް ކުރާ އިޖުތިމާޢީ މަސައްކަތްތަކުގައި އަމަލީގޮތުން ބައިވެރިވާށެވެ. ރަހްމަތްތެރިންނާއި، އެކުގައި މަސައްކަތްކުރާ މީހުންނާއެކު އަހަރަކު އެއްފަހަރު ނަމަވެސް ދަތުރަކު ދާށެވެ. މިގޮތަށް ކަންކަން ކުރެވޭނަމަ އެކަނިވެރިކަން ފިލާ އުފާވެރިކަން ލިބިގެންދާނެއެވެ.
- - ހަރަކާތްތެރިވާށެވެ. ފައިދާހުރި ކާނާކާށެވެ. ރަނގަޅަށް ނިދާށެވެ.
ހަލާލު މަސައްކަތުން އާމްދަނީ ހޯދައިގެން ޞިއްޙަތަށް ފައިދާހުރި ކާނާ ކެއުމަށް ސަމާލުވާށެވެ. ރޭގަނޑު އަވަހަށް ނިދާފައި ދަމު ނަމާދަށް ހޭލާށެވެ. އަދި ފަތިސް ނަމާދުކޮށްގެން ދުވަން ދާށެވެ. އިރުއަރާ މަންޒަރުން ހިތްހަމަޖެހުން ހޯދާށެވެ. ހަރަކާތްތެރި ދިރިއުޅުމަކަށް އެންމެ މަދުވެގެން ދުވާލަކު ބައިގަޑިއިރު ކަސްރަތުކުރާށެވެ.
ނައްސި ވިސްނުމަކީ ތަބީޢީ ކަމެކެވެ. ދުނިޔޭގައި އުޅޭއިރު ހިތާމަތަކާއި ހިތްދަތިކަމާއި ނާކާމިޔާބީއާއި ކުރިމަތިވާނެއެވެ. މިކަންކަމަށް ކެތްތެރިވެ، ފަހި ވިސްނުމަކާއެކު ކުރިމަތިލުމަކީ ދެ ދުނިޔޭގެ ޙަޔާތް ބާއްޖަވެރިވުމުގެ ތަޅުދަނޑިއެވެ. އަމިއްލަ ނަފުސު އިސްލާހުކޮށް ތިބާގެ ޒާތުން ފަށާށެވެ. އަނެކާގެ ޒިންމާތަކަށް އިނގިލި ދިއްނުކޮށް ތިބާ ޒިންމާދާރުވާށެވެ. އަމިއްލަ ޙައްޤުތައް ނުލިބުމުގެ ޝަކުވާތައް ނުކުރާށެވެ. ޝަކުވާއަކީ ގުޅުންތައް ހީނަރުކުރާ ކަތުރުފަންޏެވެ. ނައްސި ވިސްނުންތަކުން ދުރުހެލިވުމަށް ތިބާ ޝުކުރުކުރާށެވެ.
