"ތަޢުލީމަކީ ތަރައްޤީގެ ބިންގަލެވެ" މިއީ އެންމެ ކުޑައިރުއްސުރެވެސް އަހަމުން އަންނަ ވާހަކައެކެވެ. ނަމަވެސް އެބަހުގެ ހަޤީޤީ މާނަ ފަހުމްވާވަރުވީ އަދިކިރިޔާއެވެ. ޤައުމެއް ބިނާވަނީ އެ ޤައުމެއްގެ ޒުވާނުންގެ މައްޗަށެވެ. އެ ޒުވާނުން ޤައުމަށް ބޭނުންވާފަދަ ބަޔަކަށް ހެދުމުގެ އެންމެ އިސް ރޯލެއް އަދާކުރަނީ ތައުލީމީ ދާއިރާގެ ބެފުޅުންކަމާމެދު އެއްވެސް ޝައްކެއްނެތެވެ.
ފާހަގަކޮށްލަންޖެހޭ ހަޤީޤަތަކީ މީގެ ކުރިން ތައުލީމީ ދާއިރާއިން މަތީ ތައުލީމު ހާސިލުކުރާ ބޭފުޅުން ގިނަ ކަމުގައިވިޔަސް މިހާރު އެ އަދަދު ވަރަށް ބޮޑަށް ދަށްވެފައިވާކަމެވެ. ތައުލީމީ ދާއިރާގެތެރޭގައި ހިމެނޭ ބައެއް ދާއިރާތަކުން މިހާރު އެއްވެސ ްވަރަކަށް ނުކިޔަވައޭ ބުންޏަސް ދޮގަކަށް ނުވާނެއެވެ. ކޯސްތަކަށް ދަރިވަރުން ހަމަކުރެވެނީ އެހާވެސް އުނދަގުލުންނެވެ.
ދިވެހިރާއްޖޭގެ ޤައުމީ ޔުނިވަސިޓީ (އެމްއެންޔޫ) އިން މިހާރު ވަނީ "ޤައުމު ބިނާ" ކުރުމުގެ ނަމުގައި ހާއްސަ ސްކޮލަޝިޕަތަކެއް ތައާރަފްކޮށްފައެވެ. އެމްއެންޔޫއިން ބުނާގޮތުގައި ޤައުމު ބިނާ ކުރުމުގެ ސްކޮލަޝިޕެއް ތައާރަފްކުރުމުގެ ބޭނުމަކީ މި ވަގުތަށް ޤައުމަށް ބޭނުންވާ ކޯސްތަކަށް އިއުލާނުކުރުމުން އެދާއިރާއަކަށް ދަރިވަރުން ނުލިބޭ ހާއްސަ ދާއިރާތަކުން މީހުން ބިނާކުރުމެވެ.
ތައުލީމީ ދާއިރާއިން ކިޔަވަން ބޭނުންނަމަ އެމްއެންޔޫގެ ފެކަލްޓީ އޮފް އެޑިއުކޭޝަން ހިޔާރު ކުރަންވީ މައިގަނޑު ސަބަބަކީ އެއީއެވެ. ޤައުމަށް ބޭނުންވާ މުހިއްމު ދާއިރާއިން މިހުން ބިނާ ނުކުރެވޭކަން ފާހަގަކޮށް އެ މަސައްކަތްފަށާފައިވާ ޔުނިވަސިޓީއަކީ އެއީ ކަމުގައިވާތީއެވެ.
އަންނަ އޮގަސްޓުމަހު ގައުމީ ޔުނިވާސިޓީން މި އަހަރުގެ ދެވަނަ އިންޓޭކް ފަށާއިރު ކޯސްތަކުގެ ތެރޭގައި ސެޓްފިކެޓް ފެންވަރުގެ ކޯސްތަކުން ފެށިގެން ޑިގްރީ ފެންވަރުގެ ކޯސްތައް ހިމެނެއެވެ. އެގޮތުން ޖުމްލަ 41 ކޯހެއް ފެކަލްޓީ އޮފް އެޑިއުކޭޝަންގައި ކުރިޔަށްދާނެއެވެ.
އަލަށް ތައާރަފުކުރި ކޯސްތަކަށް ކުރިމަތިލުމަށް ހަމަޖެހިފައިވަނީ ޔުނިވާސިޓީގެ އޮންލައިން ޕޯޓަލް މެދުވެރިކޮށެވެ. ގައުމީ ޔުނިވާސިޓީގެ ކޯސްތަކަށް ކުރިމަތިލެވޭނެ އެންމެފަހު ތާރީހަކީ އޮގަސްޓް މަހުގެ 5 ވަނަ ދުވަހެވެ.
ތަޢުލީމީ ދާއިރާއަކީ ޤައުމުގެ ތަރައްޤީއާ ބިނާކުރަނިވި މުސްތަޤްބަލަކަށް ވަރަށް މުހިއްމު ދާއިރާއެއްކަމަށާއި އެ ދާއިރާއިން ކުރިއަށްދާން ބޭނުންވާ ދަރިވަރުންނަށް ހާއްސަ ފުރުސަތުތަކެއް އެމްއެންޔޫއިން ފޯރުކޮށްދީފައިވާކަމަށް އެމްއެންޔޫ ފެކަލްޓީ އޮފް އެޑިއުކޭޝަނުގެ ޑީން މަރިޔަމް ފިޒާނާ ރަޝީދު ވިދާޅުވެފައިވެއެވެ.
ޤައުމަށް ތައުލީމީ ދާއިރާއިން މަސައްކަތްކުރާ މީހުން ބިނާކުރުމުގެ މުހިއްމުކަން ފާހަގަކުރައްވާފައިވާއިރު އެމްއެންޔޫގެ ޤައުމު ބިނާ ކުރުމުގެ ފުރުސަތުގެ ތެރެއިން ކިޔަވަން ފިޒާނާވަނީ ބާރުއަޅުއްވާފައެވެ.
ގައުމު ބިނާ ކުރުމުގެ ސްކޮލަޝިޕްގެ ދަށުން ޕްރައިމަރީ ޓީޗިންގެ ދާއިރާއިން ޑިގްރީ ފެންވަރަށް ކިޔެވުމުގެ ފުރުސަތު ލިބޭއިރު އެ ސްކޮލަޝިޕްގެ 30 ފުރުސަތު ހުޅުވާލާފައިވެއެވެ.
ފާހަގަކޮށްލެވޭގޮތުގައި ގައުމު ބިނާ ސްކޮލަޝިޕަށް ހޮވޭ ދަރިވަރުން ކިޔަވަން ޖެހޭނީ ފުލްޓައިމް ކޮށެވެ. އަދި ސްކޯލާޝިޕަށް ހޮވޭ ދަރިވަރުންނަށް ހާއްސަ އިނާޔަތްތަކެއްދެއެވެ. އެގޮތުން އެ ސްކޯލާޝިޕްގައި ކޯހުގެ ޓިއުޝަން ފީ އާއި ކޮންމެ މަހަކު ދޭ 5000 ރުފިޔާގެ އެލަވަންސަކާއި ކޮލެޖަށް ބޭނުންވާ ސާމާނު ގަތުމަށް ކޮންމެ ސެމިސްޓާއަކު ދޭ 5000 ރުފިޔާގެ އެލަވަންސެއްގެ އިތުރުން ސްކޯލާޝިޕް ލިބޭ ފުރަތަމަ މަހު އެސްޓަބްލިޝްމަންޓް ގްރާންޓެއްގެ ގޮތުގައި ދޭ 5000 ރުފިޔާ ހިމެނެއެވެ. އެ ސްކޮލަޝިޕްތަކަށް އެދި ހުށަހަޅާނީ އޮންލައިންކޮށެވެ. އަދި ސްކޮލާޝިޕަށް އެދި ހުށަހެޅޭނީ 9 ސެޕްޓެމްބަރު ވާ ބުރާސްފަތި ދުވަހުގެ މެންދުރުފަހު 2:00ގެ ނިޔަލަށެވެ.
